Pastilan! Toto, Daday, palihug bantaji baja,
Bangkay na tinanum sa baybay nan danaw
Taga-i nan ijo hugot na pagpayangga
Dili pagpanamastamasan! Sagdaha an idu o kabaw
Kahoy linghod pa, kon an suboy malahoy, mapatay
An dubdub ko mohuot, an kinaijahan magmingaw.
Pasughi sija nan igo na kapaso nan ijo pagbati
Bisbisi nan ijo gugma na wayay pagkahidlon
Gayasa an tigbaw na madupas mopitlok sa kaligdong
Sumpu-a an bagang, anay, bukbuk sa katarung
Haw-i, haniti an palibot, patja an mga uhipan
Abonohi nan lupa dakan mosulig, mohamtong.
Damyag ugaling an kahoy ijo na kasilungan
Magduwa an ijo mga apo sa tayum nan punuan
Mohuros an tignaw na hangin tabok sa Tapian
Mga gamaw,kajaw,banog, siwit mobalik; mga lapay
Karab, tikling, mangitlog manganta sa bangkay
An ijo mga kaluja, kapit-us, kamingaw, mahupay.
An danaw buhi, magpabilin na mahinlo, matin-aw
Panon an hayuan, pantat, kasili, pijanga, bugwan
Wayay guob, an lungsod mauswagon, hamugaway
An sugod: gamay na kahoy, tagpatubo na karajawan
Tawo, hajop, kahoy, bukid, kinaija, danaw
Lakip mga jatot o ingkanto(?), tanan may kalinaw.
Subscribe to:
Post Comments (Atom)
No comments:
Post a Comment